利物浦主場迎戰韋斯咸，力爭聯賽冠軍嘅「紅軍」，未計今輪賽事，目前領先第2位嘅阿仙奴11分之多，加上今季只剩聯賽一條戰線，今場重返主場，必定全力撲擊排喺聯賽下游、又冇護級壓力嘅「錘仔幫」。
利物浦上場聯賽作客以2比3不敵富咸，終止聯賽26場不敗走勢。不過長路有盡時，相信主帥施洛深知此道理。賽前主將穆罕默德沙拿宣布與「紅軍」共同進退多兩個球季，另一主將華基爾雲迪積克續約機會亦相當樂觀。今季已經攻入32球嘅沙拿，相信唔會放棄今場任何入球機會，嚟證明自己簽下一紙厚約嘅身價，加上利物浦近5場主場成績全勝，即使門將艾利臣比加有傷在身，亦難以動搖「紅軍」整體實力。
毋須護級冇動力
「錘仔幫」上場主場被般尼茅夫逼和2比2，球隊表現未如理想，近4場聯賽未嘗一勝，主帥樸達相信難以解決季尾球員鬥心不足問題，始終球隊不愁護級壓力。加上近兩次與利物浦交手都被攻入5球，包括首循環大敗0比5，相信樸達今場只能動腦筋，加強防守減少失球數字，何況近年作客「紅軍」成績差強人意，今場送上3分機會甚高。文:謝德謙
