曼城中場奇雲迪布尼未獲續約，將於今夏自由身離隊，去向備受關注，根據英國傳媒爆料，阿士東維拉計劃簽入呢位33歲比利時國腳，意味奇雲迪布尼下季有機會繼續踢英超。
阿士東維拉主帥艾美利認為球隊缺少一位具創造力嘅中場指揮官，奇雲迪布尼無疑係合適人選，打算簽佢提升組織攻勢能力。不過，呢位中場大腦現時周薪高達40萬鎊（約400萬港元），維拉未必負擔得起，會方正在討論方案，盡量提供具吸引力條件，說服奇雲迪布尼加盟。
轉口風稱有意留英超
盛傳意甲球隊科木教練法斯加斯亦準備游說奇雲迪布尼加盟，另有多支美職、沙特阿拉伯球隊想簽佢。奇雲迪布尼曾經表示，中東球會開出嘅薪酬非常吸引，但佢近日轉口風，話唔排除留喺英超，令維拉有機可乘。
