歐霸盃4強首回合大戰一觸即發！「紅魔鬼」曼聯作客西甲勁旅畢爾包，兩隊喺大戰前都受到傷患問題影響，曼聯進攻力量一向疲弱，作客相信會先做好防守，力求不敗，等次回合返主場再搏殺，半場和值得捧場。（Now 643周五凌晨3時直播）文:工廠仔
曼聯今季本土賽事成績沉淪，歐霸盃成為佢哋起死回生嘅最後機會，有機會捧盃之餘，更可以藉歐霸冠軍躋身下屆歐聯，重要性不言而喻。曼聯實力今非昔比，對住畢爾包唔見得可以佔到上風，作客肯定會穩打穩紮，翻查曼聯近4場歐霸盃作客，上半場全部打和，今仗會照辦煮碗。
事實上，曼聯依家亦缺乏搶攻本錢，荷蘭前鋒舒亞舒克斯重傷收咧，令原本疲弱嘅鋒線雪上加霜，海倫同阿歷真度加拿祖表現飄忽，單靠般奴費南迪斯單天保至尊唔係辦法。領隊魯賓艾摩廉唔敢托大，今仗唔輸已經收貨，半場好大機會睇定嚟踢。
畢爾包同樣進攻啞火
西甲球隊畢爾包近期進攻啞火，近2場僅入1球，進攻主力尼高拉斯威廉斯上場啱啱傷愈，狀態成疑，最大鑊係陣中「士哥王」奧漢辛斯特上場聯賽拉傷大腿，今仗無緣上陣，要攻入曼聯大門亦非易事，今仗唔會輕舉妄動，開半場和機會高。
