拜仁慕尼黑奪冠派對，本輪聯賽將會提早上演，球隊作客RB萊比錫誓取3分。拜仁雖然有哈利卡尼坐波監，但利萊辛尼、京士利高文及基拿比近排輪流入球，足以彌補哈利卡尼嘅位置，而且球隊近5場聯賽4勝1和，熱捧客勝。（Now 639周六晚9時30分直播）文:渡邊年
唔係話渡邊年黑心，今場冇咗哈利卡尼，反而增加咗對拜仁贏波嘅信心。卡尼出名「黑氣石」，上季加盟拜仁踢第1場德超盃，落後之下都要趕住後備處子上陣，結果新球季就輸第1冠，對手正正就係RB萊比錫。卡尼喺拜仁捱咗一季冇冠軍落袋，今季終於有機會一嘗主要錦標冠軍滋味，偏偏今場上演嘅奪冠Party，佢就累積夠黃牌停賽，真係攞冠軍都要有啲遺憾。
萊比錫跌Watt頂唔住
拜仁近排狀態好弗，近5場聯賽4勝1和，而且上述德超盃之後，3次鬥萊比錫獲2勝1和，今場有力反客為主，加上RB萊比錫聯賽2連勝之後，表現突然下滑，上輪面對法蘭克福更慘敗0比4，今仗面對志切提早贏得聯賽冠軍嘅拜仁，難有反抗能力，客勝穩陣。
