利物浦已提早奪得今季英超冠軍，3支降班球隊亦塵埃落定，最後4輪賽事焦點必定係下屆歐聯參賽資格之爭。撇開王者「紅軍」已佔1席，第2位阿仙奴至第7位阿士東維拉，6隊爭奪餘下4張歐聯入場券，形勢非常緊湊，一輪賽事足以變天，最終鹿死誰手，大家拭目以待。文:邪神
紅軍完成任務 車仔乘細出擊
英超11點半場，車路士主場迎戰已奪得英超冠軍嘅利物浦，據報「車仔」全隊將會在史丹福橋球場列隊歡迎對方進場，球員面對出爐英超王者，戰意高昂，但要攻破「利記」防線並唔容易，佢哋近7場聯賽5次開2球或以下，入波唔多，利物浦亦已收油，再追2.5球入球細啱數。（Now 621及611周日晚11時30分直播）
車路士近期重拾正軌，聯賽連勝富咸同愛華頓排第5，歐協聯4強首回合4比1擊敗佐加頓斯，士氣正盛，「車仔」正力爭歐聯入場券，今場對住利物浦但求有分落袋，1分都唔會放過，預計佢哋除咗會主動出擊，亦會做好防守，防範「利記」突襲。
車路士前鋒尼高拉斯積遜近期重拾勇態，早前對愛華頓打破長達兩個多月入球荒，不過高爾彭馬已經連續18場交白卷，唔知幾時先重拾射門鞋。
輪換陣容歎慢板
利物浦奪冠後，球員仍沉浸喺歡樂氣氛中，事實上佢哋今季戰鬥已經結束，會方着手部署來季組軍，今場唔排除會作適度輪換，費達歷高基艾沙、遠藤航等都有機會上陣。「利記」今場作客史丹福橋球場毋須急於搶攻，預計戰況將會膠着，入球偏少。
