沙特職業聯賽，艾沙比主場迎戰伊蒂哈德。伊蒂哈德已提前封王，餘下兩輪沙特職只屬例行公事，包括今場作客艾沙比，伊蒂哈德月尾仲有場國王盃決賽對艾卡迪沙，聯賽肯定有保留，球員落場亦未必去盡，以免受傷影響備戰國王盃；艾沙比主場特佳，今場贏波亦屬正路，主勝值得捧場。（Now 633周三凌晨2時直播）文:邪神
伊蒂哈德上輪3比1擊敗艾拉德，尚餘兩輪領先次席希拉爾6分，由於同分先計對賽成績，伊蒂哈德兩循環對希拉爾各勝1場，伊蒂哈德憑得5球失4球力壓對手，提前奪得聯賽冠軍，餘下兩輪都唔使搏盡，可以養精蓄銳準備月底嘅國王盃決賽。
聯賽封王留力備戰國王盃
現時伊蒂哈德陣中唯一有比賽動力嘅球員，可能得番賓施馬，呢位法國前鋒今季累積21球，落後23球嘅C朗，如果佢想爭金靴獎，得番最後兩場機會，不過問題係其他隊友未必配合，而且就算賓施馬有波入，都唔代表伊蒂哈德贏到波。
艾沙比現時排名第6，佢哋實力雖非頂級，著名球星只有恩歷克卡拉斯高，但戰鬥力仍然不容小覷，特別在主場出擊，近5次主場賽事獲得4勝1和，今場必定把握對手心態鬆懈機會，全力搶攻爭勝，絕對有望全取3分。
