女子歐聯決賽周日凌晨喺里斯本上演，由阿仙奴女足大戰巴塞隆拿女足。阿仙奴女足今季再次起飛，史上第2次打入歐聯決賽，不過對手巴塞女足級數超班，連續5年入決賽兼力爭3連霸，論經驗同實力都喺阿仙奴女足之上，今仗乘勇搶攻，半場有力「爆廠」。（周日凌晨零時開賽）文:工廠仔
阿仙奴女足季初換帥，表現大為好轉，喺歐聯靠韌力入決賽，佢哋喺8強同4強都係先輸波再反勝，過程夠晒驚險同熱血，但亦證明球隊存在唔少弱點。
阿仙奴女足防線不穩
同埋阿仙奴女足近期喺英超都踢得麻麻，近3場賽事竟然失咗12球，防線相當脆弱，就算話留力決賽，咁差嘅走勢絕對唔係理想嘅備戰。
相比之下，巴塞女足就以無堅不摧姿態橫掃球場，歐聯9連勝氣勢澎湃，而且9場都係由上半場領先到尾，對上兩圈分別以總比數10比2淘汰禾夫斯堡女足、以及8比2踢走車路士女足，贏得不費吹灰之力。巴塞女足近3場聯賽繼續開殺戒，分別派4蛋、9蛋同6蛋，龐大實力足以輾壓任何對手，半場客勝可輕易開出。
