世盃外歐洲區K組第3輪賽事，安道爾對英格蘭。「三獅兵團」開局順利，首兩輪全勝全取6分，而且攻入5球並無失球，德籍主帥杜曹領軍有個好開始，英格蘭近7場半場全開1球或以下，今場對住「魚腩」安道爾更加唔心急搶攻，1.5球半場細屬信心之選。
（周日凌晨零時開賽）文:邪神
杜曹入主英格蘭後頭兩場都喺主場出擊，分別贏阿爾巴尼亞2比0同拉脫維亞3比0，贏波模式大同小異，上半場領先1粒，下半場再擴大比數，隊長哈利卡尼兩場都喺下半場有「士哥」，當時最矚目係重召拉舒福特，不過今次「福仔」因傷落選，至於列斯占士、佐敦軒達臣，仲有上次初獲徵召即入波嘅利維斯史基利，同埋老將丹般恩都繼續入選，可以預計英格蘭今場踢法唔會有太大改變，仍然係穩中求勝。
中場變陣磨合需時
由於對手較弱，杜曹今場打算再試陣，中場起用高爾彭馬、安東尼哥頓同布卡約沙卡3位年輕當打球員，輔助哈利卡尼攻堅，祖迪比寧咸同迪格蘭賴斯就會移後一格，呢個全新攻擊陣容可能需要時間磨合，未必咁快入局，所以上半場入波唔會多。
安道爾首兩輪全敗，0入球失4球，今場遇上小組實力最強嘅英格蘭，勢必擺定鐵桶死守，減少失球數字，佢哋主場有一定防守力，上次主場對拉脫維亞，上半場成功守和0比0，今場目標係輸少當贏，再守和半場都唔奇，1.5球半場細夠穩陣。
