Ｕ21歐國盃B組賽事，冠軍熱門德國Ｕ21首戰對住斯洛文尼亞Ｕ21，兩隊實力有一定差距。3屆盟主德國Ｕ21實力強橫，外圍賽不敗出線，而且陣中主力都係德甲球會主力，經驗同戰鬥力都有保證，第1擊會力爭打響頭炮，預料開波即搶，半場主勝值得睇好。
（周五凌晨3時開賽）文:工廠仔
德國Ｕ21喺上屆分組賽出局，不過近年新星輩出，好似巴贊古達、泰蘇迪等都嶄露頭角，當中最受注目都係天才前鋒禾達美迪，呢位身高1米98嘅史特加高大中鋒已經晉升大國腳，早前先為德國踢完歐國聯，狀態好有保證，上季德甲有12個入波同8次助攻，喺Ｕ21賽事隨時「屈機」。
斯洛文尼亞近4場不勝
德國Ｕ21戰鬥力遠勝斯洛文尼亞Ｕ21，之前熱身賽3比1贏過西班牙Ｕ21。相反，斯洛文尼亞Ｕ21近4仗不勝，近2場熱身賽都喺上半場落後，似乎入局較慢；德國Ｕ21踢法機動兼極具侵略性，比賽早段慣性搶攻，最近5場賽事有4場上半場領先，博半場主勝好路。
