世冠盃D組首輪賽事，巴西勁旅法林明高硬撼突尼西亞球隊艾斯柏蘭斯。法林明高近期贏到開巷，信心爆晒棚，對住非洲「山寨王」艾斯柏蘭斯，經驗都贏幾條街，讓1球/球半照捧上盤。（周二早上9時開賽）文:法達斯維
法林明高自從前馬體會左閘菲臘路爾斯喺去年9月中途執教後，成隊波脫胎換骨，佢領軍46場贏咗31場，勝率高達67%，先後捧走巴西盃同巴西超級盃，依家喺聯賽亦高踞榜首，各項賽事近7場取得6勝1和佳績，弗到冇朋友。菲臘路爾斯趁住6月為世冠盃專登開放嘅轉會窗，免費簽入阿仙奴中場佐真路費路（圓圖），呢位意籍巴西裔老將幫過車路士贏過歐聯及舊版世冠盃等大賽錦標，經驗夠晒豐富，令法林明高如虎添翼。
艾斯柏蘭斯非洲「山寨王」
來自突尼西亞嘅艾斯柏蘭斯，屬於典型「山寨王」，喺國內聯賽34次封王，雖然曾4度稱霸非洲，但近兩次出戰舊版世冠盃，都未能打入準決賽，無論實力或經驗，都難與喺2019年於舊版世冠盃屈居亞軍嘅法林明高相提並論，今場凶多吉少。
