兩大豪門分途出擊
世冠盃H組首輪焦點戰，皇家馬德里惡鬥希拉爾。西甲班霸皇馬劍指新版世冠盃盟主之位，不過沙特勁旅希拉爾亦唔係善男信女，而且今仗係兩軍新帥沙比阿朗素同施蒙尼恩沙基首度領軍，考牌戰大家都心急贏波立威，鬥攻格局實多波入，3.5球大盤咪錯過。（周四凌晨3時開賽）文:法達斯維
皇馬志切要捧走世冠盃，因此喺6月特別轉會窗，為剛從利華古遜回巢執教嘅沙比阿朗素頻頻掃貨，阿歷山大阿諾特、甸恩胡積臣加盟鞏固防線，其中阿諾特原本等到7月就免費來投，但為咗令佢可以出戰世冠盃，皇馬不惜畀1,000萬鎊利物浦買斷佢6月嘅合約，而老將莫迪歷更會戰罷呢項賽事先離隊，加上原有嘅基利安麥巴比、雲尼斯奧斯祖利亞同祖迪比寧咸，實力有增無減。沙比亦不敢怠慢，據報佢講明邊個唔勤力跑動，就唔使旨意上陣，預期呢場首演會主動採取前場迫搶，務求盡快入波。
希拉爾無懼駁火
另邊廂，希拉爾貫徹沙特球隊一向嘅銀彈政策，早前開出2,600萬歐元嘅天價年薪，聘請意大利籍教頭施蒙尼恩沙基，「細恩」近幾季曾協助國米奪得意甲、意盃等冠軍，並兩度殺入歐聯決賽，雖然功敗垂成，但都贏得唔錯口碑。何況陣中坐擁阿歷山大米祖域、馬高斯李安納度、馬爾甘等曾在歐洲搵食嘅中前場，近8場6次開4球或以上，攻力唔曳，施蒙尼恩沙基都想首演省靚招牌，隨時同皇馬合演入球騷。
