U21歐國盃B組最後一輪，上演英格蘭U21對德國U21重頭大戰。德國U21小組兩戰全勝已鎖定出線，不過「小三獅」上輪被斯洛文尼亞U21悶和，今場至少要攞到1分先肯定晉級，相信唔會勒住嚟踢，實行同冇包袱嘅德國U21駁火，1.5球半場大有機開出。（周四凌晨3時開賽）文:工廠仔
衞冕嘅英格蘭U21首仗大部分時間控制戰局，結果以3比1輕取捷克U21，表現甚為對辦，占士麥艾迪、尼華尼利，以及首仗有入波嘅哈維艾利洛等效力英超「Big6」嘅新星，技術同信心都爆晒棚，戰鬥力唔需要懷疑。上場被實力低一線嘅斯洛文尼亞U21悶和，雖然令人失望，但其實英格蘭U21只係差在臨門一腳，「小三獅」全場出現17次埋門，可惜只得3次命中目標，今場對住宿敵唔衰得，以呢班球員嘅質素絕對可以反彈。
德國禾達美迪腳風順
德國U21連續兩輪都贏得漂亮，7個入波盡展強大火力，賽前已被睇好「必爆」嘅禾達美迪不負眾望，兩場分組賽入4球表現超晒班，各隊後防球員都好難盯得住佢，預計禾達美迪今場會繼續努力爭取入波，力爭賽事神射手。再睇埋對賽往績，德國U21同英格蘭U21火併向來激烈，近4次交鋒半場總入球全開2球或以上，今仗一於再追半場大1.5球。
