世冠盃B組次輪上演歐洲冠軍火併南美冠軍嘅戲碼，出爐歐聯盟主巴黎聖日耳門（PSG）鬥南美自由盃冠軍保地花高。PSG首輪大炒馬德里體育會4比0，贏來清風送爽，眾將狀態弗到漏油，反觀保地花高只能險勝西雅圖海灣者2比1，可謂高下立見，不過PSG主Ｗ熱到揀唔落手，睇番佢哋近5場4次開4球或以上，轉玩3.5球入球大好過。
（周五早上9時開賽）文:邪神
PSG近期氣勢確係勁，繼歐聯決賽大炒國際米蘭5比0捧盃後，上場世冠盃首輪面對以防守硬朗見稱嘅馬體會，都可以大派4蛋，全場控球率高達75%，16次射門11次中目標，贏得充滿說服力。要知道馬體會坐擁基沙文、祖利安艾華利斯及迪保羅等球星，仲有名帥施蒙尼領軍，偏偏喺安歷基嘅控傳踢法下，毫無招架之力，足見PSG幾咁得人驚。
PSG近期連場大捷，睇嚟已成習慣，近5場4次開4球或以上，極具娛樂性，而且上場入波球員只係法比安彭拿、域天拿、辛尼馬約魯同李康仁，正選上陣嘅基華拉斯基利亞、干卡路拉莫斯同夏基美都未發威，可謂大把喺手，今場贏埋保地花高就幾近出線，唔會放過對手。
保地花高防守欠穩
保地花高係上季南美自由盃同巴甲雙料冠軍，實力自然唔差，佢哋死球戰術同高波係一大殺着，不過上場對住同組實力最弱嘅西雅圖海灣者，竟然都要失波，可見防守力未能給予人十足信心，遇上攻力超班嘅PSG鋒線，肯定頂唔住，預計今場必定多波入，3.5球大盤放心照捧。
