大家揸住3分唔使急
世冠盃D組次輪，法林明高對車路士，兩隊首輪雙雙獲勝，法林明高贏艾斯柏蘭斯2比0，車路士亦以同樣比數擊敗FC洛杉磯，可見雙方實力接近，今仗兩雄相遇理應以和為貴，各袋1分就最理想。既然車路士近6場5次開2球或以下，加上形勢上毋須急於求勝，2.5球入球細好穩陣。
（周六凌晨2時開賽）文:邪神
車路士季尾大爆發，不但奪得歐協聯冠軍，近10場更錄得9勝1負超強走勢，當中5場零封對手，然而佢哋進攻力量略嫌不足，尼高拉斯積遜表現飄忽，高爾彭馬亦未在最佳狀態，不過球隊防守力相當穩固，門將羅拔山齊士、中堅利維高維爾同艾達拉比奧約都有高水準發揮，係球隊最強後盾。
最重要嘅係，「車仔」主帥馬利斯卡正在努力改善陣容，今夏新簽22歲前鋒利安戴納，已於上輪「地標戰」後備上陣，並即交出助攻協助球隊攻入第2球，表現對辦，新舊球員經過首場磨合，相信今場會有更佳發揮。
佐真奴倒戈有睇頭
法林明高今季狀態突出，係現時巴甲「1哥」，主帥菲臘路爾斯係前馬體會名將，亦曾短暫效力過車路士，至於該隊人腳亦甚有睇頭，包括隊長謝臣山度士，新加盟嘅意大利中場佐真奴費路今仗倒戈亦係焦點所在，整體實力同車路士絕對「有得揮」。
何況法林明高近況亦當銳，近9場7勝2和，當中多達7場零封對手，以車路士嘅攻力，要攻破法林明高鐵桶防線並唔容易，而且今場和波更符合雙方利益，大家點到即止唔會有太大交收，入球細高唱入雲。
