世冠盃B組最後1輪賽事，西雅圖海灣者主場迎戰巴黎聖日耳門（PSG）。海灣者2戰2敗，出線機會極渺茫，球員大可盡情享受快樂足球。歐洲王者PSG上輪意外輸波，谷埋一肚火必定搵海灣者出氣，不過客Ｗ熱爆燈冇肉食，睇番PSG近4場有3次半場總入球開2球或以上，轉玩中位數1.5球嘅半場大。（周二凌晨3時開賽）文:Mic少
美職球隊西雅圖海灣者實力屬呢組最弱，但並冇刻意「泊大巴」死守，所以前兩場遇上南美自由盃冠軍保地花高及西甲勁旅馬德里體育會，雖然上半場就失守，難得佢哋保持進攻意欲，即使最後輸波都可以破蛋，叫做有交代。尤其嚟到分組賽煞科戰，相信海灣者會更加落力踢場「悅目」好波，贏輸其次最緊要報答球迷支持，實行豁出去同PSG鬥攻。
上場輸波一肚火
巴黎聖日耳門首場大勝馬體會4比0係威係勢，點知上仗倒灶不敵保地花高，搞到依家有出局危機。其實呢支法甲冠軍上場表現唔曳，一直壓住對手狂攻，但遇着球證兩次「漏判」12碼，仲有1球入波被判越位，認真輸得唔抵。PSG谷埋一肚氣，今場勢必發洩喺海灣者身上，盡數對手省番靚招牌。
事實上，PSG為免夜長夢多，主帥安歷基必定落「柯打」叫球員盡快領先多幾粒，提早奠定勝局，以佢哋強大火力，加上決心同質素都贏晒，上半場要入海灣者2球或以上唔難，半場大機會高唱入雲。
