U21歐國盃4強就上演名牌大戰，德國U21同法國U21爭奪決賽資格，兩隊勢均力敵。德國U21同法國U21喺8強都係戲劇性晉級，但亦暴露出防守弱點，今場生死戰必定步步為營。考慮到兩軍旗鼓相當，法定時間未必可以分出高下，和波值得一博。文:工廠仔
（周四凌晨3時開賽）
德國U21被視為冠軍熱門，當紅射手禾達美迪壓陣係原因之一，呢位前鋒亦不負眾望，今屆已入5球排射手榜首位。不過德國U21後防唔係咁可靠，8強對意大利U21喺補時失守被逼和2比2，鬥到加時最後關頭先至戲劇性贏波。法國U21情況相若，前線有馬菲斯泰爾掛帥，但後防近3仗失咗5球，包括上場要到最後6分鐘先連入2球，3比2反勝丹麥U21。
近年對賽難分高下
決賽席位當前，德國U21同法國U21唔想再食驚風散，踢法上會穩陣行先，勢必先搶中場控制權，令戰況隨時陷入膠着。翻查兩大勁旅近年對賽都係難分難解，過去6次交鋒，有4次法定時間打成平手，近4次對賽有3次打和，包括上年11月喺熱身賽打和2比2，就算兩場分出勝負嘅比賽亦只係僅勝1球，可見兩隊實力非常接近，今場博和好路。
