沙比領軍薩出血路
世冠盃H組尾輪大戰，薩爾斯堡火併「銀河艦隊」皇家馬德里。皇馬雖然續缺「麥總」基利安麥巴比，但新帥沙比阿朗素上場取得領軍首場勝仗，成功樹立威信，而且佢哋慣咗速食薩爾斯堡，半場客勝捧得過。
（周五早上9時開賽）文:法達斯維
皇馬告別安察洛堤後，請嚟名宿沙比阿朗素接手，呢位少帥喺2023/24年度球季，帶領利華古遜以不敗姿態首奪德甲冠軍，絕對唔講得笑，因此戴住「光環」重返皇馬，令人寄予厚望。不過沙比上任後即匆匆出戰世冠盃，首輪被希拉爾逼和1比1，明顯磨合未夠，上輪更早早有後衞魯爾阿辛斯奧被逐，喺劣勢下憑祖迪比寧咸、艾達古拿同費達歷高華維迪各建一功，以3比1擊敗帕丘卡，亦係沙比領軍嘅皇馬時代首場勝仗，尤其係基利安麥巴比呢兩場都因病缺陣，沙比證明咗冇「麥總」一樣可應付逆境，信心大增。
山寨王薩爾斯堡未夠班
雖然「銀河艦隊」今仗只要以2比2或以上嘅和波賽果，就肯定取得首名出線，仲益埋薩爾斯堡齊齊晉級，不過沙比深明皇馬「贏家文化」，難得樹立威信，唔會畀佢停。事實上奧地利班霸薩爾斯堡一向係山寨王，只係喺國內蝦蝦霸霸，啱啱嗰季連聯賽冠軍都保唔住，實難登大雅之堂，睇番兩軍近2次碰頭，皇馬贏晒之餘，全部都半場已經領先，加上美國天氣炎熱，皇馬更想速戰速決，半場客勝有計。
