U21歐國盃決賽上演宿敵對決，衞冕嘅英格蘭U21再度同德國U21交鋒。兩大勁旅喺分組賽曾經碰頭，當時德國U21贏2比1，不過英格蘭U21之後愈戰愈勇，連挫西班牙U21同荷蘭U21後信心爆棚，決戰德國U21必定駁火。兩軍之前對戰喺上半場已經踢得好進取，1.5球半場大值博。（周日凌晨3時開賽）文:工廠仔
小德軍5戰入14球
英格蘭U21陣容鼎盛，占士麥艾迪、哈維艾利洛、奧馬利赫捷臣、尼華尼利等攻擊球員，都已經喺英超立足，大戰經驗豐富，能夠承受高水平比賽壓力，所以進入淘汰賽後愈戰愈勇，連贏西班牙U21同荷蘭U21，兩場贏得都頗具說服力，預料決賽可以迅速入局，先下手為強。
德國U21今屆用強大火力輾壓對手，5場賽事法定時間攻入14球，當中有4場喺上半場已經領先2比0，早段搶攻戰術收效極大。德國U21擁有身高近2米嘅禾達美迪，呢位今屆已入6球嘅前鋒近乎「屈機」，U21賽事難有球員能夠阻止，德國U21必定靠呢個優勢搶攻，此外，另一鋒將尼爾遜韋柏今屆亦攻入4球，同樣不能忽視。
英格蘭U21同德國U21過去5次交鋒，戰況都非常激烈，往往喺上半場已經開放式對攻，5場半場總入球全開2球或以上。今場仇人見面、份外眼紅，為冠軍搏命施展最強進攻，1.5球半場大揀得過。
