今日下晝日職前列大戰，鹿島鹿角主場硬撼柏雷素爾。鹿島鹿角無復勇態，愈踢愈頹，相反「1哥」柏雷素爾弗到漏油，今場一定趁機打落水狗，平手盤必撐客軍。（myTV SUPER周日下午5時直播）文:法達斯維
鹿島鹿角今季表現都幾跳，好起上嚟試過10場贏9場，但差起上嚟，亦會連場不勝，自5月尾戰績直線向下，近6場聯賽只得1勝1和4負。單計近3場聯賽，鹿角先後不敵町田澤維亞、岡山綠雉及川崎前鋒，其中面對實力一般嘅岡山綠雉，鹿角有地利兼領先之下，竟然反輸1比2，好明顯已經陷入信心危機。
雖然鹿島鹿角上周中日皇盃贏波止跌，不過對手只係乙組仔長崎成功丸，不值一提，就算射手里奧施亞拉繼續有貨交，可惜前面入埋都唔夠後面輸，防守不穩先係致命傷。
日職作客王重拾信心
另邊廂，榜首柏雷素爾早前經歷小低潮後，終於全面復甦，近4場聯賽取得3勝1和，雖然對手實力平平，但連場報捷總算助球隊重拾信心。值得留意嘅係，柏雷素爾今季客場成績特別出色，12場聯賽作客共錄得7勝4和1負，客場成績冠絕群雄，加上前列形勢緊湊，柏雷素爾只係領先第4位嘅鹿角3分咁大把，為保優勢今場絕對唔會hea踢，何況今場讓球盤竟然開平手盤咁筍，柏雷素爾唔使讓波咁抵玩，梗係買得過喇。
