今日下午有日職獨腳戲，福岡黃蜂主場迎戰京都不死鳥。黃蜂狀態回勇，早前更加打和前列勁旅神戶勝利船，有助增強球員信心。不死鳥要搶分爭標亦不容有失，預料會主攻求勝，加上近4場聯賽總入球全開3球或以上，一於再追中位數2.5球嘅入球大。（無綫82台周一下午5時直播）
福岡黃蜂今季聘請44歲南韓少帥金明輝執教，水準甚為飄忽，開季首3場聯賽全敗後突然反彈，一度7戰取得6勝1和，但4至5月期間又陷入低潮，試過連續9場聯賽不勝。不過，黃蜂近3場日職演出有起色，獲得2勝1和，名副其實係「神經刀」，今仗遇上爭標分子京都不死鳥，隨時有超水準表現都唔出奇。
客軍爭標一定搏盡
至於京都不死鳥現時同柏雷素爾、神戶勝利船、鹿島鹿角爭持激烈，為保持爭標機會，必定搏盡爭勝。事實上，不死鳥走勢凌厲，近4場聯賽取得3勝1和，合共轟入11球，但亦失咗5球，預料今場就算贏波，亦未必可以保持清白之身，最好揀入球大。
