球會熱身賽重頭戲，兩支英超勁旅阿仙奴同紐卡素喺新加坡交鋒，阿仙奴上場小勝AC米蘭1比0，球員狀態不足，至於「喜鵲」紐卡素比較遲抵步，加上射手阿歷山大伊沙克缺陣，攻力大幅削弱。既然兩隊仍未上力，加上近10次對賽有9次總入球開出2球或以下，最好揀2.5球入球細。（Now 633周日晚7時30分直播）文:Mic少
伊沙克缺陣紐卡素啞火
阿仙奴今次有30位球員參加「亞洲之旅」，預料領隊阿迪達會盡量輪換陣容，觀察球員表現及試陣，勝負只屬其次。睇番上場對AC米蘭，「兵工廠」踢完上半場後，下半場開波立即更換6人，最終全場換晒11位球員。布卡約沙卡射入全場唯一入波，其實只係「撻Q」，帶有幸運成分，今仗未必再咁好彩。
至於紐卡素早前熱身賽慘吞些路迪4蛋，可見冇咗阿歷山大伊沙克，鋒線立即啞火。由於呢位瑞典國腳要求轉會，被領隊艾迪侯域踢出大軍名單，「喜鵲」未來熱身賽重點測試新鋒線組合，難免影響發揮，要攻入阿仙奴大門，並非易事。加上踢熱身賽冇必要搏盡，以免受傷影響新一季部署，相信雙方都會點到即止，入波唔會多。
