聽朝「早餐波」有場北美聯賽盃賽事，墨超冠軍托盧卡火併衞冕嘅美職球隊哥倫布機員。今場係今屆第1輪比賽，雙方唔會有太大包袱，托盧卡早前贏咗墨西哥冠軍盃，信心同士氣都喺高峰，哥倫布機員重攻輕守，博中位數3.5球入球大。（周三早上7時開賽）文:工廠仔
托盧卡上星期先捧完墨西哥冠軍盃，論士氣必定旺盛，球隊貫徹全攻型踢法，近4場比賽狂入13粒，其中巴西翼鋒希連浩開季3場聯賽已射入3球，腳風大順，聯同巴拉圭前鋒羅拔莫拉利斯組成最強攻擊組合。托盧卡入得又失得，近4仗總入球全開4球或以上，今場都會繼續用搶攻戰術同對手周旋。
哥倫布機員重攻輕守
哥倫布機員力爭成為首支衞冕北美聯賽盃嘅球隊，不過佢哋近期狀態飄忽，相信同重攻輕守嘅戰術有關，加上近期有魯迪甘馬曹及尼高拉斯夏根等防守球員受傷，上場美職對奧蘭多城，尾段連失3球遭反勝1比3，反映後防問題多多，今場以攻為守，3.5球入球大開出機會高唱入雲。
