世冠盃C組第二輪賽事，德甲班霸拜仁慕尼黑大戰阿根廷嘅小保加，呢場「歐美對決」肯定精彩。拜仁首仗狂風掃落葉炒奧克蘭城10球，破晒紀錄，一眾攻擊手都撻着晒；小保加要爭出線亦不容再失，必會貫徹主攻踢法，今場駁火味道甚濃，3.5球入球大有計。
（周六早上9時開賽）文:工廠仔
拜仁今屆以冠軍為目標，即將離隊嘅湯馬士梅拿、利萊辛尼都有份候命，加上穆斯亞拿、米高奧利斯及京士利高文等上輪齊齊入波，成班球員狀態弗到漏。英格蘭中鋒哈利卡尼上場意外冇波入，今場肯定施展渾身解數，以拜仁近4場有3次總入球開4球或以上嘅超強火力，今場將會繼續狂攻。
小保加搶分唔會死守
小保加實力唔弱，上場對葡超勁旅賓菲加，領先兩球之下慘被追和，中堅費加同中場安達靴里拉都食紅牌，今場要坐波監，防守能力再受削弱。小保加要爭出線權，今仗需要喺拜仁身上搶分，預料唔會死守坐以待斃，有望鬥攻合演入球騷，3.5球入球大抵玩。
