世冠盃A組尾輪，國際邁亞密對彭美拉斯。兩隊依家形勢大好，今仗只要和波就攜手出線，隨時夾計整走其餘兩隊，國際邁亞密受讓咁筍，梗係揀讓球主勝（+1）。（周二早上9時開賽）文:法達斯維
國際邁亞密實力可能唔及歐洲同南美球隊，但佢哋勝在個別球員質素超班，上場憑美斯射入靚罰球，以2比1反勝波圖，呢球係佢喺世冠盃第6個入波，同紀錄保持者C朗僅差1球，不過彭美拉斯頭2輪都冇失波，要攻破佢哋唔容易。
打和即攜手出線
睇番呢組形勢，邁亞密同彭美拉斯一樣有4分，而波圖及艾阿里只得1分，由於今輪波圖同艾阿里正面交鋒，邊隊贏波都係得4分，換言之邁亞密打和彭美拉斯，兩隊就會以5分攜手出線，打和絕不出奇，加上國際邁亞密近5場冇輸過，有得受讓自然揀讓球主勝（+1）。
