世冠盃B組煞科戰，馬德里體育會火併榜首保地花高。馬體會出線形勢危急，今場要大勝先有生機，預計會擺出全攻型陣式。有6分喺手嘅保地花高預計會穩守突擊，趁馬體會後防空虛搵着數，今場不乏入波機會，博2.5球入球大。（周二凌晨3時開賽）文:工廠仔
馬體會目前同巴黎聖日耳門一樣手握3分，落後保地花高3分，不過佢哋首輪以0比4慘負PSG腳下，如無意外PSG喺另一場會贏到西雅圖海灣者，馬體會今場就算贏波，都要淨勝至少3球，先可以收復3隊同分兼對賽一樣之後嘅得失球劣勢，焗住擺大個頭。據報基沙文會擔正同祖利安艾華利斯合作，馬體會近4場賽事全開4球或以上，唔愁冇入波。
保地花高反擊搵到食
保地花高射手伊戈捷西斯連續兩輪入波，狀態弗到漏，佢哋今場唔輸就足以出線，疊埋心水踢最擅長嘅快速反擊，預料伊戈捷西斯會有大把「餐士」，對住防守唔太可靠嘅馬體會，入波唔係難事，入球大可以放心捧場。
